Puku ye ya Dinnete tša bophelo ke ya dipapaditematee tše šupa (7). Ka gare ga yona go na le dipapaditematee tše di lego dinnete mo bophelong le gona di direga letšatši ka letšatši. A ke re re kwa ge monna wa nkadingalala a ganetša morwagwe go ya sekolong a re o swanetše go šea dipheko tša gagwe. Ye nngwe ke ya ge kgoši a laela gore go bolawe batho ba go ratana e le ba bongbotee (gays and lesbians) a sa tsebe gore le morwa wa gagwe o ka wona mokgwa woo. Go no swana le ya hlogo ya sekolo ge a itirela dilo a nnoši ka tšhelete ya sekolo a lebetše gore ba Lekgotlataolo la Sekolo ba mo hlomile mahlo.

Le lehloyo go batšwantle, ditaba tša ntshe di a tšwelela ka pukung ye. Go re o nwe meetse a mokgako o kgolwe, gona ipalele dipapaditematee tše ka bowena gore o tle o kgolwe gore ke dinnete tša bophelo.